Zindagi ko karib se niharne ke baad
Ab mujhe koi baat buri nahi lagti
Sidha dil pe lag jati hai...
Dikhave ke rishton se oob chuki hoon
Apne daairon me doob chuki hoon
Zindagi safar hai aur main
Is safar ke us mukaam pe hoon jahan
Ab mujhe koi baat buri nahi lagti
Bas dil par lag jati hai...
Logon ko main bhi aazmane lagi hoon
Asli nakli chehre pehchanne lagi hoon
Apne jazbaat dikhane lagi hoon
Ab main bhi ye batane lagi hoon
Ki ab mujhe koi baat buri nahi lagti
Sidha dil pe lag jati hai
Kabhi kisi ke lafz dil me utar gaye
Kabhi lafzon wale dil se utar gaye
Bade rang hain zamane ke
Kya kahoon main..
Har rang pe bas chupp hoon main
Der lagi par jaan gayi hoon
Duniya ko pehchan gayi hoon
Sabka tana bana yaad hai
Par sach hai ki mujhe..
Ab bhi muskurana yaad hai
Dil jala ke haal poochte hain log ab bhi
Main kehti hoon sab thik hai par
Sach to yahi hai ki...
Ab mujhe koi baat buri nahi lagti
Sidha dil pe lag jati hai...
No comments:
Post a Comment